Etter innføringa av koronatiltaka har mange forskarar ikkje lenger fått tilgang til kontora sine, heller ikkje dei gongene dei tykkjer dei har hatt gode grunnar til det. Det er rapportane Nils Chr. Stenseth har fått frå andre vitskaplege tilsette på UiO.
Heller pest enn korona
- Det er som om leiinga ikkje lenger har tillit til at me vil overhalda smitteverntiltaka. Det er klart at me vil overhalda dei, ikkje minst fordi dersom ein blir smitta av korona, kan utgangen verta fatal. Eg arbeider jo me pesten, og blei spurt i eit intervju om kva sjukdom eg vil føretrekkja å bli smitta av, pesten eller korona, og då svara eg at eg ville føretrekkja å bli smitta av pesten fordi den kan me behandla om ein kjem seg raskt nok til legen og får rett diagnose, seier Stenseth til Uniforum.
Etter sju veker med stengde universitetsbygningar på grunn av koronakrisa, har både Stenseth og fleire andre forskarar snart fått nok av heimekontor og lengtar tilbake til det vanlege livet på jobben. Etter at både barnehagar og dei yngste skulebarna har fått sleppt inn i bygningane dei held til i, tykkjer biologiprofessor Nils Chr. Stenseth det er meiningslaust at ikkje forskarar kan få gå inn på kontora sine og få gjort både laboratorieforsøk og ting på kontora som er naudsynte for å skriva dei vitskaplege artiklane som universitetet reknar med at dei vil forfatta.
- Meir opptekne av kontroll enn av å visa tillit
- Det er rett nok opna for det, men me må fylla ut fleire skjema kvar gong me skal inn på kontoret og levera dei til leiinga. Det syner at dei er meir opptekne av kontroll enn av å visa tillit til forskarane, konstaterer Stenseth.
Sjølv er han eit fullt arbeidande professor og får høve til å ta turen til kontoret sitt på Institutt for biovitskap når det er nødvendig, gjerne ein av helgedagane.
- Og eg er så heldig at eg berre treng å fylla ut eitt skjema, seier han lettare sarkastisk. Samtidig støttar han strenge smitteverntiltak på Universitetet i Oslo.
