KOM I MÅL: Universitetsleiinga fylgjer opp tilrådingane frå både instituttstyre og fakultetsstyre og ber Universitetsstyret vedta at klinikkane skal halda fram på Psykologisk institutt. I oktober var det høg temperatur då rektor Svein Stølen, viserektor Per Morten Sandset, universitetsdirektør Gunn-Elin Aa. Bjørneboe og prorektor Gro Bjørnerud Mo deltok på allmøte med studentar og tilsette på psykologi. (Arkivfoto)
Foto: Ola Sæther
Innstillinga frå universitetsdirektøren var klar 8. mars, og der går det fram at universitetsstyret blir råda til å vedta at studentklinikkane for vaksne skal halda fram med å vera på Psykologisk institutt. Universitetsleiinga ber styret gjera fylgjande vedtak: Universitetsstyret sluttar seg til val av modell for klinikk og praksis ved Psykologisk institutt. Styret ber instituttet og fakultetet fylgja opp klinikkdrifta ved Psykologisk institutt og rapportera jamleg til universitetsleiinga.
Tidlegare har både styret ved Psykologisk institutt og fakultetsstyret ved Det samfunnsvitskaplege fakultetet altså gått inn for å leggja alle studentklinikkane for vaksne internt på Psykologisk institutt. Når det gjeld Barne- og familieklinikken skal den halda fram med å driva som før i samarbeid med Nic Waals Institutt fram til det er gjennomført ei nærare organisering av denne klinikken.
Førte til uro
Det var eit forslag om å flytta klinikkane ut, samtidig som klinikkane blei stengde av UiO på grunn av dei ikkje blei drivne i samsvar med gjeldande lovverk, som førte til stor uro både blant studentar og tilsette på instituttet i oktober i fjor.
* Les i Uniforum: UiO stenger klinikken ved Psykologisk institutt
