Kyrne ruvar ikkje akkurat i terrenget når høgda opp til skulderblada ikkje er høgare enn om lag ein meter.
Ein grasfôra dexterokse er rundt 310 kilo og slaktemoden når den er 20-22 månader. Slaktaren får då 160-170 kilo kjøt ut av skrotten, og det saftige kjøtet er populært på grunn av smaken og den gode fettmarmoreringa.
- At dexter er små, gjer jo at me nesten kan ha dobbelt så mange dyr som om me hadde hatt ein tung rase, seier Harald Velde.
UTNYTTE EIGEN GARDDei første åra Harald og Camillla Velde dreiv garden i jordbruksbygda Vats, hadde dei ein liten part i ei mjølkesamdrift, men hadde lyst på noko meir. Garden er liten, og med eit stort og aktivt landbruksmiljø i bygda verken kunne eller ville dei kannibalisere andre for å vekse sjølv. I staden ville dei utnytte sin eigen gard maksimalt.
Litt tilfeldig oppdaga dei den irske kurasen dexter for snart ti år sidan. Den vesle, irske kurasen er nøysam og passar godt til sambeiting med 24 sauer og fire geiter i innmark og inngjerda utmark. I 2009 kjøpte dei fire drektige kviger frå Østfold.
- Me såg eit potensial til å tene pengar på det arealet me disponerer, så økonomien var ein viktig faktor for oss, seier ammekubonden, som også er dagleg leiar i landbruksverkstaden Velde Maskin AS og deltakar i grasentreprenørfirmaet Tempo Gras.
BLANDA ERFARING MED EMBRYODen gongen i 2009 var det berre registrert 80 mordyr av dexter i Noreg. Ifølgje Storfekjøttkontrollen til Animalia hadde talet auka til 552 i 2016, og i alt 455 dyr var stambokførte. Frå 2015 til 2016 auka talet på mordyr med 39 prosent, og gjennomsnittet dei fem siste åra ligg