Fagpressenytt

Nye Bodø rådhus er eigentleg eit heilt kvartal, der to eksisterande bygg er kopla saman med eit større nybygg. Kvartalet viser godt igjen i byen, utan at det framstår dominerande eller malplassert. I tillegg til å vera eit fint arkitektonisk tilskot, kan byen nyta godt av at dei administrative funksjonane er samla på éin stad. Utvendig framstår rådhuset som ei god samankopling mellom nytt og gammalt, med eit fint samspel mellom uttrykka frå dei ulike epokane. Det er likevel den innvendige delen av arkitekturen som har mest å gje. Samanstillinga av lyse treoverflater og store opne rom med mykje dagslys gjer at rådhuset er eit svært triveleg bygg å gå inn i. Den enkle materialbruken gjer bygget ryddig og harmonisk, samtidig som det er spennande å oppleva variasjonane mellom alle etasjane frå det opne atriet i midten. Dei milde treoverflatene får det store og opne kontorbygget til å framstå som alt anna enn utspjåka og overdådig.
Det eksisterande rådhuset i Bodø er bygd i 1962, som ein del av gjenreisinga etter andre verdskrig. Etter kvart har kommunen fått behov for fleire og større areal, og på denne måten har institusjonen vore spreidd på fleire stader i byen.
I 2009 starta Bodø kommune prosessen med å samla organisasjonen på ein stad. Ved å ta i bruk det eksisterande rådhuset og det gamle bankbygget, kunne dei saman med eit nybygg få nok plass til å husa alle funksjonane på same staden.
I tillegg til rådhuset, inneheldt Rådhuskvartalet eit bibliotek og det gamle bankbygget til Norges bank. Biblioteket hadde flytta til det nye Stormen bibliotek, og bankbygget var allereie i bruk som