Du får heller koma i morgon. I dag er bøndene i vår-modus. Telefonen går varm, smiler Ragnvald Gramstad, medan han småstressa fiklar med kvite øyrepluggar og spring lettbeint mellom kontora i huset til Norsk Landbruksrådgiving Rogaland på Særheim i Klepp.
Vårsola gjer noko med folk. Bøndene utgjer ikkje eit unnatak. Til hausten har han vore i jobben i 40 år. Ragnvald Gramstad var budd på at stillinga som seniorrådgjevar, i det som på folkemunne framleis blir kalla for Forsøksringen, ikkje er nokon 8-16 jobb, særleg ikkje i vekstsesongen.
- Det har blitt ein livsstil. Eg har ei tolmodig kone, som finn seg i at eg har to-tre år med avspasering til gode, seier han, og opnar latterdøra på vid gap.
Han summerer gjerne opp jobben han har hatt frå han var 24 år i 1976.
- Ein gjevande arbeidsplass i eit aktivt landbruksmiljø, saman med gode kollegar og bønder som stiller krav, seier han.
DUSJA I HUSDYRGJØDSELTrivsel er eit anna nøkkelord for seniorrådgjevaren. Bøndene kvitterer for god rådgiving på ulikt vis. Ragnvald har fleire bind med mentale utklipp, sortert blant siste nytt om nedmolding og raigras, lagra i den biologiske harddisken under den karakteristiske capsen. Det er gode, livsfremjande episodar, makelaus humor og kommentarar som aldri går ut på haldbarheitsdato. Som for eksempel den gongen den yngre Gramstad stod ved gjødselpumpa bak løa hjå ein bonde på Jæren, for å fylla i ein husdyrgjødselbehaldar i samband med eit gjødslingsforsøk.
Ekvipasjen glei seint fram, utan at Ragnvald oppdaga kva som var i ferd med å skje. Då den kraftige gjødselstråla nådde kanten på behaldaren, fekk han ein heftig gjødselsprut over seg. Han vart i løpet av eitt sekund eller to,
