HAGASTADEN: Dette er Hagastaden på grensa mellom kommunane Stockholm og Solna. Bydelen er i ferd me å bli utvikla til ein vitskapsby som skal lokka verdas fremste forskarar til Sveriges hovudstad.
Foto: Ola Sæther
Stockholm
I Hagastaden på grensa mellom Stockholm og Solna held to kommunar og eit landsting på å utvikla ein ny bydel, ein vitskapsby. I denne bydelen ligg både Karolinska Institutet og Karolinska sjukhuset frå før. I 2010 blei forskingssenteret Science for Life Laboratory (SciLifeLab) etablert. Fram til 2025 er det planar om å etablera 50 000 arbeidsplassar og 6000 nye husvære i bydelen. Hagastaden kan tena som modell for Kunnskapsbyen Oslo. I fjor haust var ein representant frå Stockholm i Oslo for å fortelja om desse planane.
Forskingsinstitusjonar og kommunar samarbeider
Og planlegginga blir koordinert frå 12.etasje i eit kontorbygg midt i Hagastaden. Der sit administrerande direktør Ylva Williams i Vetenskapsstaden Stockholm (Stockholm Science City). Saman med dei åtte medarbeidarane sine har ho lagt fram visjonære planar for korleis Stockholm kan bli ein attraktiv by for verdas aller beste forskarar. I ryggen har ho Stockholm kommune, Solna kommune og Stockholm läns landsting som saman står bak stiftinga Vetenskapsstaden Stockholm. Fire universitet er også med. Ho er svært nøgd med det dei har klart å få til så langt.
GODT UTSYN: Midt i Hagastaden sit Ylva Williams og medarbeidarane hennar i denne høgblokka og legg vidare planar for vitskapsbyen i Stockholm. (Foto: Ola Sæther)
- Målet vårt er at Hagastaden skal bli ein forskingsbydel der folk ikkje berre arbeider, men der dei også bur, trenar og brukar kulturtilboda. Derfor er det bra at me allereie om kort tid vil ha klar 6000 nye husvære, 3000 i Stockholm og 3000 i Solna. Og etter kvart som det blir ledige bygningar i området, passar me på at det kjem inn aktørar som vil driva forsking eller vil driva selskap grunnlagde på forskinga som går føre seg i bydelen, seier ei engasjert Ylva Williams til Uniforum.
Sk